قضيت العمر عايش متل بير السنين
بسقي العطاشى وبحمل هموم الحزين
وياما على هالبير مارق متعبين
يرمو سرار ويرحلو بعد الأنين

وهالبير بعدو بيحلم بنسمي
تنسم بليل تفرفط النجمي
وتوقع بقلبو تنور العتمي

يحلم وعارف سخف أحلامو
واللي بوضعو ما بينلامو
بيحلم وواعي والبشر نامو
وشو ضل غير الحلم قدامو؟

وهالبير لما بيوم ما يزورو بشر
ينقز , يخاف كتير من ظلم الضجر
وفجاة بيلمح نور بقلبو انتشر
وعا غفلتو فكر الكون انفجر
ولما تطلع عالهدا شاف القمر
وحس بالنور انتشر وقلبو غمر

تخرسن وصارت فكارو ملبكي
ويحكي ويصرخ بس ما يطلع حكي
دهشي ونشوي بالسعادي مشربكي
ومن فرحتو تكرج دموعو بالبكي

قلو دخيلك يا قمر شو عم يصير؟
شو نزلك تاتزور هالبير الفقير؟
قلو القمر يا بير لا تفكر كتير
ربك سمح بزيارتي وربك كبير

والبير يغمر هالقمر ويقول
معقول إنت هون ؟ مش معقول!
ياريت تبقى بالقلب عاطول
ويوقف الوقت ونضيع بالمجهول

قلو القمر مجبور ارجع للفضا
وضوي عاكل الناس يا جار الرضى
طول عمري فوق من ماضي مضى
وبرجع بزورك اذا ربك قضى

قلو قبل ما تفل يا جاري
إترك أثر منك على حجاري
تا إفتخر قدام زواري
إنو القمر مر عا داري


وصار القمر يعمل مشاوير
وكل فترة يطل صوب البير
يقعد معو والوقت فجأة يطير
ويرجع البير يفكفك حزازير

وفجاة إنتبه هالبير عالقصة
إنو حلم رح يخلص بغصة
غمض عيونو عن حلم كذاب
وخلى الرواية تخلص بنصا

وخبى بقلبو السر بعبابو
ورجع يفتح للدني بوابو
وما عاد بدو يحلم بكذبات
تنسيه حالو وكل احبابو


هالبير قلبو كتير بيخبي تعب
بيسمع بيسكت ما بيؤمن بالعتب
لكن تعلم من بعد خبرة حياة
إنو ما كل شي بيلمع ذهب